خودایە..
  سروشێک بنێرەو حەرامى کە
 ژەنینى فلوتەکەى غوربەت
تا ئیدى هێندە ئەشکمان پێ نەڕێژێ ئەو ژەنیارە
تۆ لە حزورى تەنیاییدا
وەرزێک تاجى سەوز دەخەیتە سەرى
جەرگى وەرزێک داخ دەکەیت و..
وەرزێک بۆ نمایشى شانۆیەکى زەرد
گەڵا گەڵا دەیهێنیتە سەما
بە ژەنینى کەمانچەى وەرزێکى ساردیش
قیژە دەخەیتە ئاسمان و هەورەکان دەگریێنى
بەڵام لە حزروى غوربەتدا
یار یەکجار بێتاقەتە
ئەو بەرگەى غەریبى ناگرێ
هەندێ لە خۆراگرى خۆتى پێ ببەخشە
تەنیایى  گشت گیانى تەنیوە
تۆ فێرى کە بەرگەى تەنیایى چۆن بگرێت
پەنجەرەکە دەکاتەوە لە برى خۆر
نامۆیى دەڕژێتە ژورەکەى
لە برى من
تەنیایى باوەشى پیا دەکات
لە برى ژیان
مردن بانگى لێ دەکا
لە برى شیعر
سەفەر دەنوسێتەوە و..
لەبرى ئەمەل
بێزارى لە دەرگاى دەدات
خودایە
منیش بێ ئەو زەمەنێکە
ژیان لەبەردەم ماڵەکەمدا تێپەڕ نابێت
ئەگەریش بوو سەڵاو ناکات و دەڕوا
دەنگى دەرگا لێدان دێت و..
دەیکەمەوە کەس نابینم
تەماشایەکى کوچەکە دەکەم
دەبینم تەنها "با" پیاسەى تیا دەکات
لە چاوەڕوانى زەنگى تەلەفونەکانى ئەودا
وەکو شەم دەتوێمەوە و..
وا هەست نایبینمەوە
هێندەى دەنکە گێلاسێک عیشق مزرە
بەبێ  ئەو
هێندەى باخى فیردەوس
خەریکم ئازار دەچنەوە لە دورى ئەو
هێندەى قەدەر نامۆییم لێ دەچۆڕێ
جانتاکەم پڕە لە فرمێسک و..
باوەشم پڕە لە تەنیایى
ماڵم پڕ لە هەناسەى سارد
خەونەکانم پڕە لەو
هۆش مەستە بە بیرکردنەوە لەو
خودایە
ئەم نامەیەم لێوەرگرەو بیخوێنەرەوە
یان بمگەیەنە بە یار
یانیش ئەوم بۆ بنێرەوە

ئەى زەمەن
ئەمە دواهەمین هەناسەکانى من و..
دواهەمین چرکە بەفیڕۆ چووەکانى تۆیە
دەبنە وشەى رژاوو..
کاغەزێک بە مەستى فڕمان دەکات
ئەمە دواهەمین وڕینەکانى من و
دواهەمین بێدەنگیەکانى تۆیە
قەڵەمێک دەیخوێنێتەوە
ئەمە دواهەمین پێکەنینە درۆزنەکانى منە بەدەم تۆوە و..
دواهەمین فرمێسکە تیمساحیەکانى تۆیە
بۆ من هەڵیان دەڕێژى
ئەمە دواهەمین گەڕانەکانى من و
دواهەمین چاوشارکێیەکانى تۆیە
کەلاوەیەک دەیگرێتە خۆ
ئەمە دواهەمین دەزووى تەمەنم و..
دواهەمین هەڵواسینى تۆ
بە دیوارى کاڵبوونەوەدا هەڵدەزنێ
ئەمە دواهەمین من و.. ئەوەش دواهەمین تۆ
وەک دواهەمین هەنارى دونیا*
کە سەریاسء هاوڕێکانى نەیگەیشتنێ
وەک دواهەمین وەسیەتەکانى باوکم
کە فریا نەکەوتن لەزارى بێنە دەرێ
وەک دواهەمین جەنگەکان
کە کۆتایى پێنایات و هێشتاکە سەرەتایەتى
وەک سەرەتاى  دواهەمین  کۆتاییەکان
پێدەچێ ژیان لێرەوە دەست پێبکات
کە من کۆتایى پێ دێنم و..
بە مەرەکەبى سپى هەموو ئیمزاکانم
لەسەر پسولەى ژیان دەسڕمەوە
ئەگەر نا
کەى وادەى لە دایک بوونى  ئەم دێڕانەیە
من لە عیشوەى  ئەم قەسیدەیە تێناگەم
هێندە نەبێ کە دەیبینم سەفەرى لە کۆڵناوە و..
بێهودە هەڵدێت
رەنگە تەفسیریى خەونى سەدەفەکانى لەلابێت و..
بیباتەوە بۆ دەریا
رەنگە کراسى تریفەى  بە ئیستعارە وەرگرتبێت و..
بیباتەوە بۆ مانگ
رەنگە نەخشەى وڵاتى دەستکەوتبێت و..
بیداتەوە بە دەستى نیشتمان
رەنگە لە حیکمەتى وەرینى گەڵا حاڵیى بوبێت و..
لە دەفتەرى رۆژانەى پایز بینوسێتەوە
رەنگیشە بگەڕێت بۆ ئەبەدیەتء نەیدۆزێتەوە
ئەبەدیەت ئەو سەرابە بوو
لە چاوتروکانێکا ون بوو
ئەو بابوجە بوو.. کە قاپقاپەکەى لێ بووەوە
ئەو بڕیارە بوو کە جێ بەجێ نەکرا
ئەو شیعرە بوو کە تەواو نەکرا
جەنگى ئەو قەیسەرە بوو
کە هەر زوو شکستى پێ هێنا
ئەوەى بگەڕێ بۆ ئەبەدیەت
دەبێ سەرێ بکێشێ بە ماڵى مردنا
لەوێندەر بە دیوارى مەرگەوە
کراوەتە چوارچێوەیەکى لاکێشەیى
بە بزمارێک
هێندەى بزمارەکەى عیساى پێ لە خاچ درا
هەڵواسراوە
کەس نەگەڕێ بۆ ئەبەدیەت
ئەبەدیەت وەکو ئەم قەسەیدەیە کوژرا
ئەوەتانێ کێ لە لەهجەى ئەم قەسیدەیە دەگا
کە دەڵێ:
ئێرە مەملەکەتى مردنە
ژیانێک نەماوە خەونى پێوە ببینم
شاعیرێک نەماوە وەک خۆم بمنوسێتەوە
باخچەیەک نەماوە بتوانم تیایدا بڕوێم
شەقامێک نەماوە بە جورئەتەوە پێیدا تێپەڕم
سولەیمانێک نەماوە گورگء مەڕ ئاشت بکاتەوە
خودایەک نەماوە عیبادەتى بۆ بکرێت..
زۆر سەیرە..!
من لە نوسینى ئەم قەسیدەیەش ناگەم
رۆژ نیە
ئایەتى مەرگ بەسەر ژیاندا نەخوێنرێت
شەو نیە
لورەى گورگ بە گوێماندا نەیەت
ساڵ نیە
نەڵێین خۆزگەمان بە پار
ئێرە مەملەکەتى جەلادە
جەلاد ئەم قەسیدەیەى کوشت
قەسیدەیەک
سەرى سەرى وێنەکێشێک بوو
دەستى هى پیانۆ ژەنێک
دڵى هى شاعیرێک و
دەنگى هى گۆرانى بێژێک
پشتى هى مێژوونوسێک و..
قاچى هى موسافرێک
چ وەحشەتێکە کوشتنى ئەم قەسیدەیە
کە رۆحى لە ژێر پەرچەمى خاوى ئێوارەیەکدا
گینگڵی داو..
وەک گەڵاى پایزى قەڵەمێک
هەڵوەرى و مرد

3/9/2006

"با"بە تەنیشت ماڵمدا تێدەپەڕێ و..
بیرى دەچێت دەرگاو پەنجەرەکەم بخاتە سەرپشت
پێڵاوەکانم دەڕۆن و..
بیریان دەچێت پێیەکانم لەگەڵ خۆیاندا ببەن
"خەو"بەبەر چاومەوە سەما دەکات و..
بیرى دەچێت بێتەسەر پێڵووەکانم
"خۆر"بە ئاسمانەوە هەڵدێ و
بیرى دەچێت سڵاو لە تاریکى ژورەکەم بکات
"باران" بەخوڕ دادەکات و
بیرى دەچێت چۆڕێک ئاو بڕژێنێتە گەروى تینوێتییەوە
"یار"دەڕواتء بیرى دەچێت بێتەوە
منیش لەتێ سێوى مردن دەخۆم و..
بیرم دەچێت هەندێکیش بۆنى ژیانەوە بکەم
لە وەرزى بیرچوونەوەدا
منداڵەکانیش بیریان دەچێت پێ بگرن
عەیامێکە ژیان یاوەرى کەس نابێ
جگە لە بیرچوونەوە
ئیمارەتێکم لە "فکر"دروستکرد و.
ئیمبراتۆریەتى جەهل بردیە ڕێوە
خاکێکم بە عیشق تۆو کرد و
دارى خیانەتى تیا ڕووا
مەعبەدێکم لەوەفا پڕکرد و
فەتواى نەمانى تیا درا
دەیان دەستنوێژى یەقینم هەڵگرت
جگە لە دوو رکات ترس
نوێژى جورئەتم پێ نەکرا
تا لەسەر وبەرماڵى وجود
وێردەکانم
ئاراستەى زانین بکەم و..
لە گوناهى نەزانین پاک ببمەوە
لە دامێنى خەیاڵێکى نارنجیشدا
دێرى قەسیدەکانم
ئولفەتیان بە وشە ژەنگرتووەکانەوە گرت و..
خۆیان دوبارە کردەوە
ئیدى نازانم چى بنووسم
کە تەنها بیرچوونەوە میوانمە
نازانم من بیرم دەچێت بڕۆمە لاى شیعر
یان شیعر بیرى دەچێت ببێتە میوانى پێنووسەکەم..
لەساڵى نەهامەتیدا
لەسەر پەڕاوى یادەوەرى هەوردا
بە هێڵێکى گەورە نووسراوە
وەرزى بیرچوونەوە!!

ئاوێزان نورى

ئاوێزان نورى

لەگەڵ سووتانى باڵى پەروانەیەکدا

بە شەمعى ژوورەکەم

من دەسوتێم

لەگەڵ شکانى پەنجەرەى ماڵێکى چۆڵدا

من دەشکێم

لەگەڵ وشکبوونى گەڵایەک

بەدارى مەینەتى پایزەوە

هەڵدەوەرێم

لەگەڵ هەناسەی ماندووى چۆلەکەیەکدا

ماندوو دەبم

لەگەڵ ئازارى گوڵێکى نێو باخچەکەم

بە دڕکی قەدو باڵاى خۆیەوە

ژان دەگرم

لەگەڵ "با"دا سەما دەکەم

لەگەڵ ئاوابوونى خۆردا

ئاوا دەبم

لەگەڵ ووتنەوەى تەراتیلەکانى کڵێسادا

لەخاچ دەدرێم

لەگەڵ بانگى موحەمەد

پڕ دەبم لە گووناه

لەگەڵ باراندا

تەڕ دەبم و

لەگەڵ غەریزەکانى پیاوێک

ژنێتیم لێ دەچۆڕێ

لەگەڵ رۆیشتنەکانى یار

غەرقى فیراق دەبم و

لەگەڵ خۆمدا

تەنیایى رادەموسم

مەراق تەق تەق

لە دەرگاى بێئومێدیم دەدا و

رۆژانە دێت

سورەتی تەنیاییم لەسەر دەخوێنێ و

ئایەتەکانى نامۆییم بۆ شیتەڵ دەکاتەوە

دەڵێ: ئەو شەوەى تۆ تێیدا لە دایک بوویت

ئەستێرەکان دەیانزریکاند لە حەژمەتى مانگ گیراندا

بۆیە نە بەر تریفەى مانگ کەوتى و

نە ئەستێرە ئاگاى لە دایکبوونت بوو

تا لە کەژاوەى خۆیاندا بتخەوێنن

ئەو وەرزەى تۆ تێیدا لە دایک بوویت

گوڵەکان دەگریان بۆ نەهاتنى باران

بۆیە بێ خەبەر بوون لە تۆو

هەندێ لە بۆن و جوانى خۆیان پێوە نەکردى

ئەو کاتەى تۆ تێیدا لە دایک بوویت

کاتژمێرى ژیان لە چرکە چرک کەوتبوو

بۆیە هەرگیز نەچوویتە لیستى بوونەوە

ئاى لە خۆم

ئەو شەوە بوو زەمەن

قامکەکانمى لەسەر وەتەرى بێدەنگى دانا و

ئاوازە نامۆییەکانى خۆى فێر کردم

گەرووى پڕ کردم لە نۆتەى  خنکاوو

گۆرانیە شکاوەکەى خۆی پێ وتمەوە

ئاى خودا

وەک قەرەجێک

نێو لەپى زەمەنم خوێندەوە

هێماى ژیانم کورت و

هێڵى بەختیاریم دیار نەبوو

بە کوچەکانى عەدەمدا تێپەڕیم و

بەسەر باڵى بوراقێکى ئەندێشە

روو لە ئاسمانێکى نادیار هەڵکشام

هەر ئەوەندەم پێ کراو

هەر وەکو ئێستاش غەریب بووم لەگەڵ خۆمدا

لەگەڵ تارمایى خەمێکى بێ کۆتادا دەژیم و

لەگەڵ تەواوبوونى ئەم شیعرەش دەمرم

مانگى 6ى

سەیرە کە دەژیم و لە مردوو دەچم

سەیرە کە پێدەکەنم و نۆتەى گریان لە گەرووم دێتە دەرێ

سەیرە کە دەمەوێ شتێک بنوسم و نابێتە هیچ

جگە لە دڵۆپە ئەشک و

بەسەر گۆناى خۆم و شیعرەکانمدا دێنە خوارێ

من ئەم گریانەم پێ تەفسیر ناکرێ

هەروەکو چۆن

خەون و خەیاڵ و حیکمەتەکانى ئاوم بۆ تەفسیر نەکرا

من ئەم هەموو ئازارو خەمەم بۆ ئەژمار ناکرێ

هەروەکو چۆن ئەستێرەکانم بۆ ئەژمار نەکرا

لە پەناگەى ئەم گریان و ئازارانە

حەقیقەتم لێ تاڵ بووە و مومارەسەى مردنێک دەکەم

تا ئیدى

قەڵەمەکەم بەردەوام فرمێسک نەنوسێتەوە و

وشک نەکات

حەرفەکان لێڵ ببن و

حونجە نەکرێن

ژین پێم پێبکەنێ و منیش بگریم..

بە ژمارەکانى هەنسک تەمەنم کۆى پێکەنین کرد و

دابەشى گریانم کردەوە مایەوە هیچ

ئاخر خودایە

هێند گریاوم

لە دوورەوە بۆنى گریانم دەکەن

نازانم.. حیکایەتى ئەم گریانە بێ سنورەم لاى کێ باس بکەم

خەونى ئەم فرمێسکانەم

بۆ چ ئاوێکى بگێڕمەوە

نەشئەى ئەم هەمو هەنسکەم

تەزو بە جەستەى چ قەدەرێکدا دێنێ

خودایە

قەرار بوو

(حیکمەتەکانى گریان لاى ئەو ئاشکرا بکەم

داستانى فرمێسکى بۆ بگێڕمەوە و

گینگڵى هەنسکى بۆ بدەم)

کەچى خۆیشم

سەر لەم هەموو نوزە نوزەم دەرناکەم

لە نیشتمانى منداڵیمدا هەر گریانم دەزانى و

هیچى دى نا

لە گەورەبوونیشمدا هەر گریان دەزانم و

هیچى دى نا

لە بۆشایى خۆمدا دەخولێمەوە

زاکیرەم خاڵیە لە هەموو شتێک و

پڕە لە گریان

حەقیقەتم نابەڵەدە بە خۆم و

شارەزایە بە گریان

نازانم00 تاکەى قاوە بۆ پێکەنینە ونبووەکانم بگرمەوە

کە گریان نەهێڵێ جگە لە خۆى

هیچ لە فنجانى قەدەردا بخوێنمەوە

 
قەرارەو دەڕۆم                                                                            
تا لەم وەرزە ساردەى وەکو خۆم یاخیى
لە بەرگى گەڵایەک
 بارانێک تەڕم بکات و ..
 بایەکیش پاڵێکم پێوەبنێ و بمکەوێنێت
 لەم شەوە دەیجورەشدا
 لە دەنکە شقارتەیەک دەپاڕێمەوە
 مۆمێکم بۆ داگیرسێنێ
 تا قەڵەم..
 کوێرانە حەسرەتەکانم نەنوسێتەوە
 چ قەرارێکى لیمۆییە..
 رەنگى دەدا بە رۆخسارم
 ترشى دەڕژێنێتە سەر لێوە وشک هەڵاتووەکانمء..
 شەق شەقى دەکا..؟
  وەک پرتەقاڵە نەگەییوەکەى حەوشەکەمان
 چ هیجرەتێکى کاڵە بە قەدو باڵاى رۆحمەوە..؟
 ئاخر لێرەدا چ بکەم.؟
 چ لە وڵاتێک بکەم
 هەموو شتێکى تێدابێ ژیان نەبێ
 چ لە ژیانێ بکەم
 هەموو مردنێکى تێدابێ و ....
 لە مردن نەچێ
 چ لە وەڵامى پرسیارێک بکەم
 لە نێو کتێبەکانى یاسادا شیتەڵ کرابێتەوە..؟
 ئاخر لێرەدا چ بکەم
 نە یاسایەک شەرعیەتم پێدەدا
 بە خۆمدا شۆڕببمەوەو..
 نە دڕک و شوشەش دەهێڵن
 بە پێخواسى بەسەر ئەرزى خودادا رێبکەم
 ئاخر لێرەدا چ بکەم
 کە ماڵێکم لە بەفر دەدەنێ و ..
 خۆرم وەک گورگى برسى تێ بەردەدەن
 ژیانێکم لە شوشە بۆ دروست دەکەنء..
 سەنگەسارم دەکەن
 تەنورەو عاباکەم هەراج دەکەن و ..
 پێم پێدەکەنن
 بۆیە دەڕۆم
 دەڕۆم لە داخى ئەو کوڕەى
 نازانێ ئایەتەکانى ئەوینم تەفسیر بکات
 دەڕۆم لە داخى ئەو دایکەى
 واز لە گریان ناهێنێ بە دووى باوکمداو ..
 باوکیشم واز لە مردن ناهێنێ و بێتەوە
 دەڕۆم لە داخى ئەو ساڵەى
 وەرزەکانى لەسەر یەک ریتم
 بەسەرما دەبارێنێ
 لە داخى ئەو رابردووەى
 بیناقاقام دەگرێت و ..
 ناهێڵێ بپەڕمەوە ئەوبەرى..
 پردى سیراتى ئایندە
 دەڕۆم تا خومار دەبم لە پەنا دیوارەکانى غوربەت
 دەڕۆم تا قاچەکانم لە رۆیشتن دەکەون
 تا پاژنەى بابوجەکەم لێدەبێتەوە
 تا جانتاکەم لە شانم یاخیى دەبێ
 دەڕۆم تا لە ژێر لقى درەختێکدا
 دوا نوستن دەمباتەوە
 نێو باخەڵى خەونەکانى منداڵیم و ..
 رۆحم دەنێرمەوە ئەو رێگایەى
 لە کاتى هاتنیدا شوێن هەنگاوەکانى ون کرد
 دەڕۆم بۆ پێشوازى کردن لە نازانم چى
 کە دەکەوێتە ئەودیوى قەرارەکەم
 کفنێک لە گەڵا دەبڕم بۆ بەرم
 بەڵکو بڵێن:
 کچێک لە مەنفاوە لە دایک بوو
 لە وەرزى خەزان ژیاو ..
 لە بەرگى گەڵایەکدا مرد

ئاوێزان نورى
 9/12/2005
 

تۆ..
 ئەى ئەو کەسەى لە خەون دەچیت و..
 بە کەس تەفسیر ناکرێى
 بەر لە هاتنى مەرگ..
 وەرە زەخرەفەى بەرگى..
 ئایەتەکانى حاڵیی بوونم لەبەرکە
 تا دەسماڵێک لە وەفا، بدەمە سەر شانى عیشق و..
 ئارەزووى گەمەیەکى دى لەگەڵ ژیاندا بکەم
 بەر لەوەى
 پۆرترێتى پاکیزەیى رۆحم
 لەسەر تەختەى رەشى قەدەر بکێشى
 فێرم بکە، رەنگى رەشم چۆن خۆشبوێ..؟
 خۆم چۆن خۆشبوێ
 تا لە چوار چێوەى تابلۆیەکدا
 بە تەنها پێناسەیەک دیل نەکرێم و..
 لە مۆنالیزا جوانتر بم
 بەر لەوەى
 نازنازى ناو ئینجانەکان
 بۆ باخچە بێنازەکان ببەیتەوە
 بە رێحانە بڵێ خۆى لە بەرۆکم دا
 تا عومری پایزییم لێ موتربە نەکرێ
 بەر لەوەى
 رەنگى بێ دەنگى بگرى
 لەهجەى بێ وتەم فێربکەو..
 حیکمەتەکانى بێدەنگیم بۆ بگێڕەوە
 تا لەو پەیڤانە حاڵیى بم کە ناوترێن
 تا لەو ژیانە حاڵیى بم
 کە لێرە بە رۆحێکى پڕ ناردم و..
 لەوێندەر بەدەستى خاڵیى هاتەوە
 تا لەو سەفەرە حاڵیى بم
 کە پێت وایە زەمیلەیەک بەختەوەریم بۆ جێدێڵێ و..
 پەناهەندەى ئاسودەییم پێدەبەخشێ
 یارۆ گیان
 تۆ دەزانى من کچى شەوم
 هەموو بونەوەرێک لە مندا ون دەبێ
 تۆ ون مەبە
 دەستە درێژەکانى..
 قەهرو خۆشى لە مندا مەبەستەوە
 من نە لە جلیوەى ئەستێرەکانى خۆم حاڵیى دەبم
 نە لە پیاسەى ئێوارانى تۆ بە کەنار فۆبیا
 گەر حاڵیی بام
 لە پێدەشتى مەراقێکدا
 عاتیفەم
 زیندەبەچاڵ نەدەکرا
 تۆ
 ئەى ئەو کەسەى لە من دەچى و..
 لە منیش ناچى
 فێرمکە لێکچوون یانى چى
 گەر چاوێک نەبێ بۆ تەماشا
 تا رەنگى یەکدى لە ئامێز  بگرین..
 حاڵیبوون یانى چۆن..
 گەر لەم ئەرزە فراوانەى ئاهورا مەزدا
 بستێک، جێگا نەبێ بۆ مێزگردێک..
 لە نێوان من و تۆو تێگەیشتندا
 هەنگاوێک، رێگا نەبێ
 بۆ رۆیشتن لە سەرى
 یارۆ گیان
 زۆر گریام تا لە پێکەنین حاڵیى بم
 تۆش زۆر پێکەنیت تا نەزانى گریان یانى چى
 وەرە من با نهێنیەکانى گریانت لا ئاشکرا بکەم
 داستانى فرمێسکت بۆ بگێڕمەوە
 گینگڵى هەنسکت بۆ بدەم
 تا حاڵیى بیت
 مێو لە خۆڕا نایەوێ بە دارو دیوارا هەڵزنێ
 گەر ترێ لە بەهاى خۆى هاوێر نەکرێ و..
 نەبێتە شەراب و سرکە
 قەیسى لە خۆڕا توڕە نابێ
 گەر لە جەژندا
 قودسیەتى خۆى لە دەست نەدا
 توو لە خۆڕا بەدارەوە هەڵناوەرێ
 گەر با تۆزقاڵێک شەرمى لێبکاو..
 منداڵانى کۆڵانیش بەرۆکى رانەتەکێنن
 شیعر لە خۆڕا لەچاوەکانى سەحەردا هەڵنایات
 گەر ئاوڕێک لەولاى ئیحساس و کەرامەت
 پڕی نەکەن لە گوناه
 یارۆ گیان
 من فێرى گریانت دەکەم
 تا چ دەنکە زەیتونەکانى خەم هەیە..
 لە ناختدا بیڕنى و..
 بیانبەخشیتە فرمێسک
 بەڵکو لە حیکەمەتى ژیر بوونەوە حاڵیى بى
 تۆش حاڵیم بکە
 پێکەنین یانى چى
 بەر لەوەى قاقایەک شێتم بکا
 پێم بلێ
 چۆن سەما لەگەڵ بووندا بکەم و..
 پەنجەکانم لەسەر چ ریتمێک ژیان بژەنن
 فێرم بکە کاتێک کە دەمرم
 چۆن ئومێدى گەمەیەکى دواى مردنبکەم..؟
 یارۆ گیان
 
ئاوێزان نورى
3/2/2006کەرکوک
 

من و نەورۆزى کچم
 باوەش بەیەکدا دەکەین و باوەش بەژیان
 بۆ یەکدى پێدەکەنین و بۆ ژیان
 بۆیەکدى دەگرین و بۆ ژیان
 بۆ یەکدى دەمرین و بۆ ژیان
 بۆ یەکدى دەژین و بۆ ژیان
 ئێمە ژیانمان خۆشدەوێ
ژیانیش ئێمە
 ئەو لە کاتى گەمەکانی
 بە جۆلانەو بوکە شوشەکانى  ژیان
 فێرم دەکات چۆم منداڵ ببمەوە
 من لە کاتى گریان و خەندەکانمدا
 فێرى دەکەم گەورە بوون یانى چى
 ئەو لە کاتى نوستنیدا
 فێرم دەکات خەونى جوان چۆن ببینم
 من لە ژوانەکانمدا
 فێرى دەکەم چۆن چاوێکى لە ژیان بێ
 نەبادا گورگەکانى جەلاد بیخۆن
 ئەو لەکاتى خۆ گۆڕیندا
 فێرم دەکات کە ژیان .. بە گۆڕانەوە چەند جوانە
 من لەکاتى جل شتندا
 فێرى دەکەم ناشرینى و بوغزەکانى جیهان
 چۆن پاک دەبنەوە
 ئەو لەو کاتەى کە بانگم دەکات دایە
 فێرم دەکات خاک و دایکم چەند خۆشبوێ
 من لەو کاتەى کە بانگى دەکەم نەورۆز
 فێرى دەکەم دارى مێژووى نەتەوەکەى چەند سەوزە
 من و نەورۆزى کچم
 هەموو شتێک فێرى یەک دەکەین و ..
 فێرى ژیان
 ژیانیش هەموو شتێکمان فێر دەکات و ..
 فێرى خۆى
 هەرسێکمان دار عەساى یەک هەڵدەگرین و ..
 بەرەو مەنزڵگەى ئاسۆ دەکەوینە رێ
 کە دەکەوێتە ماڵێک بە تەنیشت ماڵى خوداوە
 لەوێندەر
 مرۆڤ نابین و  شتێ تر
  تا ناچار نەبین
 پێناسەى جەلاد بۆ یەکدى بکەین
 پەرى نابین و شتێ تر
 تا مایەى ئازار نەبین
 بۆ ئەوانەى ناتوانن بمانبینن
 ژن نابین و شتێ تر
 تا روگەى ئارەزوو نەبین
 بۆ ئەوان
 من لەگەورەبونمدا منداڵ دەبمەوەو..
 ئەو لە منداڵى خۆیدا با گەورە بێت
 تا بتوانین حەقى بوونمان
 ببەخشین بە یەکدى و بە ژیان

ئاوێزان نورى
 28/8/‏2006‏ کەرکوک
 

من پڕم لە رەنگەکەکانى تەنیایى.. ئەویش لەمن
 گەڵا.. گەڵا.. تەنیاییم لێ هەڵدەوەرێ.. ئەویش من
 شەوان لەنێو باخەڵى حەسرەتەکاندا
 تەنیایى بەخۆمدا دەدەم
 بەیانیانیش بەزەنگى (ئەو) بەئاگا دێمەوە
 ئەو.. ئەوى ساقى
 هەردەم لەسەر مێزى فیراق
 تاڵیى شەرابى تەنیاییم پێ هەڵدەداو..
 بەسەرخۆشى..
 بەکۆڵانى تریفە کوژراوەکاندا
 دەمنێرێتەوە بەر دەرگاى..
 ژورێک یاخى لەپەنجەرەو..
 پەنجەرەیەک یاخى لەمیواندارێتى مانگ و ..
تەوقەکردن لەگەڵ ئەستێرەکاندا
 بەسەرخۆشى..
 دەمباتەوە بەر حاڵگرتنى ئەو دەفەى..
 نێڵە نێڵێتى بەدەستى دەروێشێکى..
 عاشق بە زیکرێکى سۆفیانەو..
 تێکەڵ بوونێک لەگەڵ خودا
 ئەوو..
 ئەو سێبەرێکە
 بەرۆح و جەستەمەوە لکاوەو..
 بەتەک هەنگاوەکانمەوە..
 پیاسەى تەنیاییم پێ دەکا
 منى تەنیا و ..
 ئەویش لەکۆڕى ئەویندا..
 بەنەغمەى حەسرەتێک
 بەیاخى بوونى پەنجەکان
 لەژەنینى کەمانچەى عاتیفە
 شیعرو گۆرانى تەنیایی دەڵێتەوە
 من تارمایى و ..
 ئەویش لەنێو دەفتەرى بیرەوەریەکانیدا
 دەمخاتە نێو دێڕى ئەو برینانەى..
 ساڵ بەساڵ.. فێرى ژانەکانى تەنیایى دەکردن و ..
 ئەفسانە دەمنووسێتەوە
 من درەختى زەمەنێکم.. تەنها تەنیایى دەگرم
 ئەویش لە ژێر سێبەرى گەڵا خوراوەکانى گومانم پاڵدەکەوێ و ..
 بە تەمەوە..
 دەستى نیگا بە باڵا لاوازەکەمدا دەهێنێ و ..
 بەقێزەوە دەم بۆ میوە گەییوەکانى قەدم دەبا
 من تەنیا و ..
 لەگەڵ تەنیایى سەفەردەکەم
 ئەویش لەنێو هەناسەمدا گوزەر دەکا
 من دەمەوێ خۆم لە تارمایى تەڵاق بدەم
 ئەو دوبارە لەتەنیایى مارەم دەکا و ..
 گۆزەى سەرشانى قەدەرم..
 لە ئاوى مەراق پڕ دەکات
 بۆشاییەکانى ئەم ژیانە بەچى پڕ دەبنەوە
 ئەگەر بەتەنیایى نەبێ..؟
 لەقوتابخانەى نامۆیى..
 چى بڵێم و .. بخوێنمەوە
 گەر وانەى تەنیایى نەبێ..؟
 لە حەزارەتى دەورانم.. کێ ببەمە عەرشى فەلەک
 ئەگەر خواى تەنیایى نەبێ..؟
 لەسەدەى کڵۆڵیمدا
 تەنیایى فرعەونێکە..
 لەتابووتى جەستەمدا مۆمیا کراوە
 لە ماڵى دۆزەخێکدا
 تەنیایى ئاگرێکە
 لەگوناهە بەربەریەکانم بەربووە
 لەشارێکى نابەڵدا
 تەنیایى میوانێکى زوگورتیە
 لەسەر تەختى چارەنووسم.. نیشتەجێیە
خودا تەنیاو..
 پایز تەنیاو..
 گریانى پیاوێک لەوڵاتى غەریبى.. تەنیا
 پێکەنینى ژنێک لەبەرامبەر ئاوێنەکەى تەنیا
 زیندوویەک  تەنیا دەمرێت و ..
 دەچێتە گۆڕێکى تاریکیش  بەتەنیا
 من تەنیاو..
 لەگەڵ ئەویشدا هەر تەنیام
 چ فەلسەفەیەکە تەنیایى
 ئەو لەمندا
 منیش لەئەو..
 هەردووکمان لە بێکەسیدا هەڵدەکەین

ئاوێزان نورى
 24/3/2005کەرکوک